"Oso ondo ikusi dut taldea, partidu ona egin dugu, beldur gabe jokatu dugu. Defentsan lan ona egin dugu eta erasoan ere polito moldatu gara", azaldu digu Josetxo Muniategik.
Partidua bere osotasunean ikusita, berdinketa merezitako emaitza dela gaineratu digu. Baina, bigarren zatian garaipena eskuratzeko aukera aparta izan zuten. "Bigarren zatian gehiago izan ginela uste dut. Gu gainera bat gehiago izanda zelaian, garaipena izateko aukera izan dugu esku artean. Baina aurkariak, une batean, aurretik jarri zaizkigu nahiz eta bat gutxiagorekin jokatu. Hor egon zen partidua eta huts egin genuen", azaldu digu entrenatzaileak.
Hurrengo partidua Donostian
Egiaren aurkako partidua ez da erraza izango. Jaitsiera postuetan dago talde donostiarra eta dena emango du puntuak lortzeko. "Gogorra izango da azken postuan daude eta. Puntuak eskuratu nahiko dute, hil ala biziko partidua izango da Egiarendako", dio Muniategik.
