"Nekatuta gaude euskal herritarron borondateari eta konponbide nahiari Espainiako Gobernuak behin eta berriz ematen dion erantzunarekin. Nekatuta gaude ehiza zentzugabe eta giza eskubide oinarrizkoenen eraso atergabearekin. Nekatuta gaude herri honek urratsak eman eta entzungor egiten tematzen direnekin", horixe adierazi du INOereLIBRE ekimeneko Xabier Zubizarretak mobilizazioaren amaieran.
Hala ere, gaineratu du nekatuta daudela, baina ez dela neke geldiarazlea ezta suntsitzailea ere: "Alderantziz, egunez egun indar handiagoa eta erabakitasun irmoagoa dugu, baita gaur ere, bidean aurrera egiteko eta giza eskubide guztien defentsan lanean segitzeko".
Galparsororen hitzak
Ino Galparsoro Arrasateko auzipetua iritsi da mobilizazio momenturako Madrildik eta halaxe gogoratu du gertatutakoa: "Gu tartean aurkitu gara, izan ere, gaur hasten zen epaiketa. 35ok eta sei abokatu geunden atzo Madrilen hotelean eta gauean guztiok joan ginen ohera baina gaur goizean hiru abokatu falta ziren, izan ere, poliziak eraman ditu. Ni neu hantxe bertan nengoen, baina ez ditut ikusi."
Hauxe gaineratu du: "Bueltan etorri gara amorru handiarekin, baina era berean, konbentzituta herri honek daukan presoekiko elkartasuna eta askatasun gosea sarekada honek ez duela etengo."
Epaiketa udarara arte luza daiteke
"Ez dakigu oso ondo nola jarraituko duen. Epaileak esan digunez, izan daiteke edo datorren astean jarraitzea abokatuak libre egon eta defendatzeko aukera izango dutelako, edo horrela ez bada, atzeratzea. Badirudi berak agenda oso beteta duela eta komentatu digu beharbada atzeratuko dela ia udarara arte", halaxe jakinarazi du Galparsorok.
