Elgetan gaur bertan egingo dute kalejira eta dantza arratsaldeko lehen orduan, Herri Eskolako neska-mutikoek eta irakasleek gidatuta.
Aramaion Inauterietako kontzertua egingo du Trikiti Eskolak gaur, 18:00etan hasita, kultura etxean. Lagun Artean dantza taldeak ere emanaldia egingo du herriko kaleetan, 19:00etan irtengo baitira frontoi ingurutik.
Bergaran martitzenera arte iraungo du festak, eta gaur eguerdian Mariaren Lagundiko eta Aranzadi Ikastolako ikasleek kalejira egingo dute. Gauean, 22:30ean hasita, Bergarako Musika Bandaren eta Bergarako Orkestra Sinfonikoaren Aratusteetako kontzertua izango da.
Zapatuan egingo dute eztanda Inauteriek, ostera, Arrasaten, Eskoriatzan, Leintz Gatzagan, Antzuolan eta Oñatin.
Aretxabaletan jakina da domeka izaten dela egunik ederrena. Aurretik, baina, egongo da zertaz gozatu, Leizarra Musika Eskolakoek Egubakoitz Argal jaia ospatuko baitute gaur Ibarra kiroldegian, 18:00etan hasita.
