Guztia prest dago Aretxabaletan 2023ko Aratusteei ongietorria egiteko. Mozorroei azken ukituak ematen aritu dira egunotan aretxabaletarrak eta, hilabete luzeetako prestaketen ondoren, jai giroan murgiltzeko gosea dute. Kalean sumatzen da egun handirako soilik berrogeita zortzi ordu gelditzen direla. Aratuste-domeka baino lehen, motorrak berotzen hasiko dira gaur Leizarra Musika Eskolakoak; Ibarra kiroldegian, 18:00etan, Egubakoitz Argal jaia ospatuko dute. Bihar, berriz, bola-zaleek hitzordu garrantzitsua izango dute bolatokian; izan ere, Bolo Txapelketa jokatuko da, 22:30ean.
Domekarako egitarau mardula
Otsailaren 19an, baina, etorriko da aretxabaletarrentzat urteko egun bereziena. 10:00etan hasita, dianak herria esnatuko du, eta ondoren, 11:45ean aurtengo Santa Ageda neska-mutilek txino dantza egingo dute; Herriko Plazan hasi eta buka, Durana kalean eta Mitarte kalean barrena aritu ondoren. 12:00ean, eguneko beste hitzordu garrantzitsu bat iritsiko da; kuadrillen desfilea. Hori amaitutakoan, bi eskaintza aukeran: herriko hiru musikarik kontzertua eskainiko dute Ezkutu kanpoaldean eta Gesaltza txarangak herriko kaleak girotuko ditu. Goizeko giroa bizi ondoren, bazkaltzera joango dira aretxabaletarrak; bazkari golfoa ospatuko da Iturrigorri pilotalekuan, eta ohiko herri bazkaria Ibarra kiroldegiko kantxa nagusian. Bazkal ondoren, 17:00etan Arlutzeko kantxan DJak egongo dira eta, beti bezala, 18:45ean mozorro lehiaketaren sari banaketa egingo dute, Herriko Plazan. 19:00etan, Santa Ageda neska-mutilek azken dantza emanaldia eskainiko dute.
Gune morea
Eraso matxistarik gabeko Aratusteen alde, Udalak gune morea jarriko du Josu harategiaren parean 18:00etatik 22:00etara. Aratusteak ofizialki otsailaren 21ean amaituko dira, martitzenean 20:00ean Txinen hiletarekin. Ohiturari jarraituz, Santa Ageda neska-mutilek zerraldoa eramango dute Mitarte Plazatik Herriko Plazaraino.
