Ohi baino harrera gutxiago antolatu dituzte herrietan, baina pandemia sasoira egokitutako formatuekin, Olentzerok eta Mari Domingik ez dute hutsik egingo.
Oñatin eguerdian egingo diete harrera neska-mutikoei. 12:30ean helduko dira udaletxera eta hango balkoira aterako dira herritarrak agurtzera.
Arrasaten iluntzean egingo dute desfilea; 18:15ean abiatuko dira Musakolatik eta Txaetaraino joango dira.
Bergaran ez dute egingo goizeko agerraldirik baina arratsaldeko desfilea ohi baino luzeagoa izango da. 18:00etan abiatuko dira Udal biltegitik.
Aretxabaletan ere ez da izango eguerdiko harrerarik baina bai desfilea; Ibarra kiroldegitik irtengo dute 18:30ean eta kalez kale joango dira geldialdirik egin barik.
Eskoriatzan eskutitzak jasoko dituzte haien laguntzaileek eguerdian, eta kalejira 17:00etan egingo dute.
Antzuolan kalejiran irtengo dira goizean Errekaldetik. 18:30ean, berriz, San Josetik etorriko dira eta udaletxeko balkoira igo handik agurtzeko neska-mutikoak.
Aramaiora Ibargoiatik etorriko dira Herriko Plazara, 18:00ak bueltan.
Eta Leintz Gatzagan baserririk baserri joan beharrean kantuan Herriko Plazan elkartuko dira neska-mutikoak, 13:00etan.