Bergarako Candy-Hoover itxi egingo dutela komunikatuko zaiela espero dute langileek

Bergarako Candy-Hooverreko langileek egun erabakigarria dute gaur, eguena. Roberto Roncalli Candy-Hoover taldeko giza baliabideetako zuzendariaren bisita izango dute lantokian. Enpresa batzordearekin elkartuko da. Notizia onak ez dituzte espero. Oso litekeena da —hala jaso dute bulegoetako langileek— komunikatzea Bergarako lantoki historikoetako bat behin betiko itxi egingo dela eta, besteak beste, 1951n goitik kargatzen diren Otsein garbigailuak egiteari ekin zion enpresak agur esango diola, 152 langileren etorkizuna ziurgabetasunera kondenatuz.

Egoeraz kezkatuta, Candy-Hooverreko langileek manifestazioa deitu dute gaur, eguena, iluntzerako, Bergaran, Enpleguaren alde, deslokalizaziorik ez! lelopean. 19:00etan San Martin plazatik abiatuko dira.

Aste osoa daramate lantoki aurrean elkarretaratzea egiten Bergarako Candy-Hooverreko langileek. 10:00etatik 11:00etara. Gaur ere elkartuko dira. Ostean, 11:30ean, batzarra dute Candy-Hooverreko buruetako Roberto Roncallirekin. Italiatik dator Bergarara, taldeak hartu duen erabakiaren berri ematera. "Ez dakigu, zehazki, zerekin etorriko den eta milaka galdera ditugu, baina notizia onak ez ditugu espero. Bulegoetako langileek, dagoeneko, jaso dute jakinarazpena: Bergarako lantokia itxi egingo da" dio Candy-Hooverreko langileen ordezkari batek. "Erabakia hartuta dago; orain, ez dakigu zein izango den proposamen zehatza, baldintzak...".

Enplegu Espediente Erregulazioekin

Bergarako Candy-Hooverren 2008tik dihardute Enplegu Espediente Erregulazioekin. Orain lan, orain etxera. Aurten, urtarriletik uztailera arte lanean normal ibili dira, baina abuztuko oporren ostetik apenas egin dute lanik. Aurreko astean, astelehen eta martitzen lan egin dute; barikuan ere bai…

152 langile ditu gaur egun Candy-Hooverrek Bergaran, baina langile asko galdu ditu azkeneko hamarkadetan. Fagor Etxetresna Elektrikoen itxieraren ostean, bazirudien Candy-Hoverrendako aukera bat irekitzen zela. Merkatuan, garbigailuen gama altuan kokatuta dago Candy eta berezitasun bat dauka, gainera: goitik kargatzen diren garbigailuak egiten ditu. Baina ez dute bururik altxatzerik lortu, kontsumoa ez delako hazten.

Bergarako industria gainbeheran

Abuztuko oporren ostean, bereziki, ezinegona, zurrumurruak eta susmo txarrak handitu egin dira Candy-Hoverreko langile eta haien familiakoen artean, bereziki; baina Bergaran, oro har. Orain arte ikur izan diren hainbat enpresaren gainbehera edo erorketa ikusi delako herrian: ehungintzan, Tavex taldeko herriko azken fabrikaren, Tavesaren, itxiera; labegaraien desagerpena eta altzairugintza kolokan dela, Arcelor Mittalekin; orain, Candy-Hoverrren itxiera.

Langileek hainbat protesta ekitaldi egin dituzte irailean. Lantegiko elkarretaratzeez gain, azkena, joan zen eguenean, 23an, Bergarako kaleetan barrena, "etorkizun duina" eskatzeko.

Candy-Hoover Txinan

Produkzioaren zati bat edo produkzio osoa Txinara eramatea da Candy-Hoover taldearen asmoa. Taldeak ez ditu urte onak bizi eta Bergarako planta ez da bideragarria, langileek diotenez. 2012an, karga aurretik sartzeko garbigailuak egiteko fabrika eraiki zuten Txinan, eta iaz, berriz, karga goitik sartzeko garbigailuak egiteko beste bat eraiki zuten. Azken produktu hori da Bergaran egiten duten bakarra gaur egun. Lerro horretan egunean 400 garbigailu egiten dituzte, urtean 70.000. Eta hori da Bergaran egiten dutenaren erdia.

Hortaz, "lasai asko egin ditzakete guk beste edo gehiago Txinan, eta gaur egun ez dago merkaturik horrenbesterako. Goi kargako garbigailuen garapena beherantz doa, eta kostuarengatik, uste dugu Txinara, Turkiara, Aljeriara edo halako lekuren batera eramango dutela produkzioa", esplikatu zuen Ramon Romerok, Candy-Hoover enpresa batzordeko presidenteak duela hiru aste.

Mayc, 1941ean sortua

1941ean sortu zen Mayc enpresa, gaur egungo Candy-ren aurrekoa. Julio Azkargorta buru zuen hainbat enpresabururen eskutik. Zulagailuak, barautsak, transformadoreak eta alternadoreak bezalako lanerako makina elektrikoak egiten hasi ziren, baina, pixkanaka-pixkanaka, etxetresna elektriko txikiak fabrikatzeari ekin zioten: kafe-errotak, irabiagailuak edota bizarra mozteko makina elektrikoak.

Horien arrakastaren ondotik etorri zen Otsein, 1951n: Euskal Herrian eta Espainian egin zen lehen garbigailu automatikoa. Otsein euskal berbak zerbitzari edo morroi esan nahi du. Sukaldeak, berogailuak eta lehorgailuak ere egin zituzten 50eko hamarkadatik aurrera.

1992ean, italiarrak

1992a mugarria izan zen Bergarako lantoki historikoarendako. Izan ere, merkatu globalizatuan ezin lehiatuz, Candy talde italiarrak erosi baitzuen Mayc. Eta, ordutik aurrera, beste etxetresna elektriko batzuk produzitzen ere hasi ziren Bergaran: hozkailuak, ontzi-garbigailuak, izozkailuak… Baina, langile kopurua, urtetik urtera, murrizten joan da.

Erlazionatuak

Candy-Hooverren itxierak atsekabea eta kezka sortu du langileen eta herritarren artean

Bergara

Candy-Hoover lantegiko langileek eta herritarrek bat egin zuten atzo iluntzean Bergarako kaleetan. Manifestazioa egin zuten Enpleguaren alde, deslo...
Candy-Hooverreko langileak enpresaren jarrerarekin "engainatuta"

Bergara

Egun erabakigarria izan da gaurkoa Bergarako Candy-Hoover enpresako langileentzat. Roberto Roncalli Candy-Hoover taldeko giza baliabideetako zuzend...
Bergarako Udalak kezka adierazi du "Bergarako ehun industriala jasaten ari den galerarengatik"

Bergara

Bergarako Udalbatza osatzen duten alderdi guztiek (Bildu, EAJ, Aralar eta PSE-EE) aho batez onartu dute Candy-ren itxieraren gaineko adierazpen ins...
Bergarako EH Bilduk elkartasuna adierazi die Candy-ko langileei

Bergara

Bergarako EH Bilduk "saminez" bizi du Candy-ko langileen egoera eta "kapitalismo neolibera" jo du Bergarako enpresa ixtearen erantzule. "Indarrean ...
Produkzio kostu handiak, "lehiakortasunik eza" eta salmenten murrizketa, itxieraren arrazoiak

Bergara

Candy-Hoover taldeko zuzendaritzak aditzera eman ditu, prentsa ohar bidez, Bergarako lantegiaren itxieraren arrazoiak.
Bergarako Candy-Hoover itxita, 152 langile kalera

Bergara

Konfirmatu da. Langileen artean atzotik bolo-bolo zebilena egiaztatu du gaur Candy-Hoover taldeko giza baliabideetako arduradunak, Roberto Roncalli...
"Etorkizun duina" eskatu dute Candy-Hooverreko langileek protestan

Bergara

Elkarretaratzea egin zuten atzo arratsaldean Candy-ko  langileek Bergarako lantegia "likidatuta" dagoela salatzeko. Protestekin jarraituko dut...
Bergarako Candy-Hooverren plantaren etorkizunarekin arduratuta

Bergara

Bergarako Candy-Hoover enpresako langileek Bergarako plantaren etorkizunarekiko kezka kaleratu dute. Produkzioaren jaitsiera nabarmenak, duten ia l...

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.