JAIAK

Baltsa jaitsierako eta olinpiadetako indarrak errekuperatzeko baliatu dute askok kuadrillen eguneko herri bazkaria. 500 lagun ingururentzako jan-edana prestatu dute, eta  entsaladak, oilaskoak eta saiheskiak osatu dute menua. Aurtengoan, gainera, lehen aldiz Espoloian egin dute bazkaria; beroaren aurrean, bertako zuhaitz eta etxeen  itzalak estimatu dituzte bertaratutakoek. Amaitzeko, Naizarai txarangak animatu bazkalostea.

Bazkaria egin dute erretiratuek San Joxepe elkartean eta ondoren dantza saioarekin gozatzeko aukera izan dute.

Jolas parkea izan behar zuena, uretako jolas parkea bihurtu da iragarrita zegoen eta egin duen muturreko beroagatik. Ipintzako patioan jarri dituzte jolasak, eta bainujantzia soinean, uretako jolastetan freskatu dira haur eta gazteak.

Berotik du gaurko eguna ere, eta Pentekosteetako herri kirolen ohiko hitzordua eguzkiarengandik babestuta egin dute; Bideberriko ibilbidean, hain zuzen ere. Besteak beste, Hodei Ezpeleta, Mikel Agirre, Xabier Zaldua eta Ernesto Ezpeleta Bihurri aritu dira aizkoran, eta harri jasotzen, berriz, Ainhize Zumeta. Hainbat proba gainditu behar izan dituzte kirolariek.

Pentekoste jaietako egitarauaren barruan, Izan zaitez Bitorianatxo egun batez ekimena egin dute Bergarako Oxirondo gunean. Zintzilik Emozioen Laborategiak antolatuta, 10 eta 16 urte arteko gazteek Bitorianatxok egin zuen ibilbidearen antzeko esperientzia bizitzeko aukera izan dute tirolinan behera jaitsiz.

Pentekosteetako ekitaldiek ez dute behera egin astelehen eta martitzenean eta herritarrek jai giroan murgilduta jarraitu dute. Baltsa-jaitsiera, kuadrillen arteko olinpiadak, gazteen bazkaria, umeen jolasak, herri kirolak, erretiratuen bazkaria eta gehiago izan dira bi egunotan.

Bitorianatxori ondo-etorria egin eta ezin hobeto hasi zituzten jaiak bergararrek egubakoitzean. Beroa protagonista izaten dabilen Pentekosteetan ekitaldi mordoa izan dituzte herritarrek asteburuan Oxirondon zein gainerako kale eta guneetan.

Arrangoitzeko musikariak girotu zuen Pentekosteetako domeka ilunkera, eta kantuan jarri zituen Oxirondoko txosnagunera joan ziren herritarrak. Bideoan, Maitasun nortasun abestia.

Bosgarren edizioa izan du aurten Mokoloblok topaketak, eta asteburuan, oro har, bero handia egin duen arren, herritarrek ez dute hutsik egin dagoeneko egitarauan egonkortuta dagoen ekimenera.

Gaur goizean eskaini du Pentekoste jaietako urteroko kontzertua Bergarako Musika Bandak. Bero zapa egiten zuen Espoloian. Puntuan hasi dira, 12:30ean, eta askotariko piezak eskaini dituzte. Hala, jaietako domekan izaten den kontzertuaz gozatu ederra hartu dute herritarrek, beste urte batez.

Neomak izan da Oxirondo plazako agertoki nagusiko talde handietako bat. Amaitu dituzte disko berriaren aurkezpen-kontzertuak eta plazaz plaza hasi dira. Lehenetarikoa izan da Bergarakoa. Bete egin zen, atzo gauean, Oxirondo.

Euskal Herriko zortzi errekortadorek ikuskizun komikoa eskaini zuten atzo arratsaldean zezen-plazan. Maisuki ibili ziren animalien gainetik saltoak egiten, nahiz zabuekin eta bestelakoekin jolasean erakustaldia egiten. Urteak ziren Bergaran ez zutela halakorik egiten; duela bi urte errekuperatu zuten formatua, eta segida eman diote orduz geroztik.

Pentekosteetako ohiturari jarraituz, Bakailao Lehiaketa egin dute gaur goizean. San Martin plazako lanak direla eta, sukaldeak Espoloian jarri dituzte aurten, eta giro bikaina nagusitu da. Julen Leturiak eta Erlantz Olabarriak, Kaskaras elkarteko kideek irabazi dute txapela, 81 punturekin. Bigarren postuan San Blas Madura elkartea geratu da, 76 punturekin; eta hirugarren postuan Alberto eta Andoni, 68 punturekin. Asun Iglesias, Aitor Etxeberria eta Celsa Fernandez epaileek osatu dute puntuazioa erabaki duen mahaia. 

Atzo piztu zen Pentekosteetako jai giroa Bergaran, eta gaur goizetik erraldoi, txistu eta trikiti doinuek hartu dituzte kaleak. 10:45ean abiatu dira kalejirak herriko hainbat gunetatik: Bolutik Bergarako Txistulari Banda, Labegaraietatik Bergarako trikitilariak eta Oxirondotik Elgoibarko dultzaineroak. Guztiak Ariznoa plazan elkartu dira ondoren, BET elkarteko erraldoi txikiekin batera Mizpirualdera bisita egiteko.

Atzoko gauak sekulako giroa utzi zuen Pentekoste jaietan. Brigade Loco taldeak urte askoren ondoren berriro jo zuen etxean, bere herriaren aurrean, eta ikusmina handia zen hasieratik. Oxirondo plaza goraino bete zen eta zaleek eztarria utzi zuten kantuan. Aurretik, No Limits taldeak giroa berotu zuen. Xaxau txosnagunean kontzertua ematen ari zirela argia joan bazen ere, emanaldia Oxirondon amaitu zuten, Brigade Loco aurretik giro aparta sortuz. 

Festen hasiera-egunean paella-jana egin dute Seminarioko karpan, Oxirondo Aisialdi Guneko gurasoek antolatuta. Ostean, disko-festaz gozatu dute Kiliklon taldearekin. 

Santa Marinako erlojuan 20:00ak zirenean jaitsiko da Bitorianatxo kanpandorretik behera. Bergararrak zain zituen jendez lepo zegoen plazan eta ondo baino hobeto moldatu da Oxirondoko oholtza nagusiraino heltzeko. Orduan lehertu da festa jai-gunean. Bergararrak agurtu ostean, 50. urteurrena ospatzen ari den Lokatza Ziklismo Eskolako lagunek hartu diote lekukoa.