Debagoiena ez da soilik mendizaleen eta lasaitasunaren bila dabiltzanentzako helmuga; kultura, historia eta ondarea eskutik hartuta aurkezten dituen eskualdea ere bada. Aurten, Aste Santuko egun gorrietan eta ondorengo Pazko Astean, turismo-eskaintza oparoa prestatu dute hainbat herritan, bisita gidatuak, esperientzia parte-hartzaileak eta ingurune natural zoragarriak uztartuz. Apirilaren 17tik 20era egindako jarduerek harrera beroa izan dute, eta aste honetan ere, hainbat aukera mantenduko dira bisitarientzat zabalik.
Arrakasta eta parte-hartze handia
Oñatin, apirilaren 19an egindako Oñatiko Altxorrak bisita gidatuan 30 lagunek parte hartu zuten. Herriko ondare historikoaren altxorrak gertutik ezagutzeko aukera izan zuten: Euskal Herriko lehen unibertsitatea, San Migel parrokia eta beste hainbat eraikin esanguratsu.
Leintz Gatzagan ere, Gatz Museoak bisitari ugari hartu ditu. Apirilaren 17tik 20ra bitartean, 300 pertsona inguru bertaratu ziren bisita gidatuetan parte hartzera. Arduradunak adierazi duenez, eskaintzak jende askoren interesa piztu du, eta plazak azkar bete ziren. Museoak gatzaren ekoizpen tradizionalaren inguruko esperientzia aberatsa eskaintzen du: milioika urteko gatz-iturburuaren historia, XVIII. mendeko dorlak eta erakusketa interaktiboak nabarmentzen dira.
Bestalde, Arantzazun egindako Izan artzain egun batez jarduerak ere arrakasta izan du. Apirilaren 18an, Gomiztegi Artzain Eskolaren eta Arantzazuko Parketxearen eskutik, artzaintza eta gaztagintza uztartzen dituen esperientzia berezi bat eskaini zitzaien parte-hartzaileei. Ibilaldi gidatua, artzain txakurren erakustaldia eta gazta-dastaketa uztartu ziren jardunaldian. Horrekin batera, hainbat bisitarik Arrikrutz kobak ezagutzeko aukera izan dute, bisita gidatuen bitartez.
Arrasaten, atzo —apirilaren 20an— egin zen Arrasateko Birako ibilbidea, herriko auzoak mendiz zeharkatuz lotzen dituen ibilaldi gidatua. Parte-hartzaileek ingurune naturala eta arkitektura tradizionala uztartzen dituen ibilbidea egin zuten, interes handia piztuz.
Bisita gidatuek jarraipena izango dute Pazko Astean
Aste Santuko egun nagusiak amaitu diren arren, Debagoieneko turismo-eskaintza ez da itzali. Pazko Astean, apirilaren 21etik 27ra bitartean, hainbat bisita gidatu eta esperientzia turistiko izango dira oraindik martxan. Aste honetan, herri ezberdinek aukera zabala eskainiko dute ondarea, natura eta memoria historikoa uztartzen dituzten planak egiteko.
Leintz Gatzagako Gatz Museoak ateak zabalik izango ditu apirilaren 25ean, 26an eta 27an. Bisita gidatuak euskaraz eta gaztelaniaz egingo dira, eta interesa dutenek aurrez izena ematea gomendatzen da, plaza kopurua mugatua baita. Bestalde, Oñatin oraindik bisita daitezke Arantzazuko Santutegia, Txokolatearen Bidea eta Oñatiko Altxorrak izeneko ibilbide historikoa.
Bergaran, Aroztegi aretoa eta Laboratorium museoa izango dira ikusgai aste honetan zehar. Bi espazio horiek zientzia eta historia uztartzen dituzte, esperientzia didaktiko eta erakargarriak eskainiz. Elgetan, berriz, apirilaren 27an egingo da lubakietara bisita gidatua, eta memoria historikoaren transmisioa izango da ardatz.
Jarduera hauek erakusketek, ikus-entzunezko emanaldi bereziek eta familientzako proposamenek osatzen dute. Debagoiena kulturaz eta historiaren indarraz beteriko helmuga bihurtu da Pazko Astean zehar. Informazio gehiago nahi izan ezkero, Goiena.eus webgunean eskuragarri dago.
