Urriaren 7an Iñigo Urkullu lehendakariaren gobernuak osasun larrialdi egoera baliogabetu zuenetik, prebentzio neurrietara mugatu dira COVID-19aren hedatzearen aurkako neurriak: jende pilaketak saihestea, barrualdeak aireztatzea, eskuak maiz garbitzea, musukoa erabiltzea... Abenduaren lehen egunetan, baina, bestelakoa da egoera.
Datuak gora
Atzo eguneratu ziren bilakaera epidemiologikoaren datuak, eta bailaran, bederen, nabarmena izan da azken egunetako kutsatzeen gorakada: pandemiako positibo kopuru handiena erregistratu zen eguaztenean, abenduaren lehenean, Debagoienean. Bailarako intzidentzia-tasa 944koa da, Gipuzkoako tasa orokorraren ia parekoa (966). Ospitaleratzeei dagokionez, EAEn 207 herritar zeuden atzo erietxeetan, eta horietako 55 Zainketa Intentsiboen Unitateetan.
Larrialdi egoera
Atzo arratsaldean sinatu zuen Iñigo Urkullu lehendakariak osasun larrialdi egoera aktibatzeko dekretua. Gaur goizean argitaratu da EAEko Aldizkari Ofizialean, eta ondorioz, jada indarrean da larrialdi egoera Araban, Bizkaian eta Gipuzkoan.
Bueltan da LABIa
Bide beretik, Larrialdiei Aurregiteko Bidea-LABI Euskadiko Babes Zibileko Plana martxan jarri zuen Eusko Jaurlaritzak; hots, bueltan da pandemiaren egoera aztertzen eta egoeraren araberako neurriak hartzen dituen LABI batzordea. Gaur arratsaldean bertan egingo dute lehen bilera, 16:30etik aurrera. Lehendakariaren batzorde hasierako hitzartzea zuzenean jarraitzeko aukera egongo da.
Neurri berriak
Eusko Jaurlaritzak ez du gaur arratsaldean neurri berriak ezarriko dituenik ziurtatu. Azaroaren 16an neurri murriztaileak bete ezin diren ekintzak aldi baterako bertan behera uztea eskatu zien Jaurlaritzak udalei, eta hainbat dira jada datozen egunetan egingo ez diren ekintzak; tartean, Arrasateko Santamasak. Auzitegi Gorenak Covid Ziurtagiri Digitala eskatzeko baimena eman ostean, ikusteke dago nola, noiz eta zein esparrutan aplikatuko duen Iñigo Urkulluren gobernuak eskumena.
Ziurtagiria deskargatzea
Bi bide daude Covid Ziurtagiri Digitala deskargatzeko: aurrez aurre edo online. Aurrez aurre egiteko, hitzordua eskatu behar da Jaurlaritzaren webgunearen bidez edota 945 01 90 00 telefonora deituta.
Sarearen bidez, aldiz, lau urratsetan eskuratu daiteke ziurtagiria. Identifikazio elektronikoa egin behar da lehenik, Osasun Txartelaren zenbakia eta jaiotze-data sartu ostean eta mugikorrean jasotako segurtasun kodea sartu gero. Behin hiru urratsak eginda, automatikoki sortzen da ziurtagiria, eta deskargatu ostean, inprimatzea edo gailu digitaletan eskuragarri izatea gomendatzen du Jaurlaritzak. Esteka honetan dago ikusgai prozedura osoa.
Txertaketa kanpaina
Osasun sailburu den Gotzone Sagardui argi mintzatu zen astearteko agerraldian: "Txertaketa, txertaketa eta txertaketa". Bada, atzo ezagutu ziren txertaketa kanpainaren datu berriak; 60 eta 69 urte arteko herritarren hirugarren edo errefortzu dosiari dagokionez, lau egunetan 1.163.533 herritarretatik 60.141ek jaso dute jada hirugarren ziztada, %5,17ak, alegia.
