Amica ezaguna da Fagorrentzat, izan ere, 2014ean Fagor Etxetresnak erosteko interesa agertu zuen, eta ostean, 2017an, CNA Group-i erostekotan ere izan zen.
Jakitera eman den aurreakordioaren arabera, Amicak Fagor marka erabiltzeko eskumena izango luke etxetresnen linea zurian. Bestalde, beste enpresa batzuekin ere hizketan dabilela jakinarazi du Fagor Kooperatiba Elkarteak, kasu horretan, gailu elektriko txikien, sukaldeko tresnen eta konfort eremuetan erabiltzeko Fagor marka.
Fagor marka
2017ko azaroan abiatu zuen Fagor Kooperatiba Elkarteak markaren kontrola berreskuratzeko prozesua. Fagorrek hitzetan, Edesa Industrialek ez zituen erabilera baldintzak bete, eta ondorioz, 2014an sinatutako kontratua –30 urterakoa zena– eteteko erabakia hartu zuen. Edesak, bere aldetik, guztia "normal" zihoala adierazi zuen une hartan. 2018ko apirilaren 10ean egin zen epaiketa, Donostian.
Orain jakitera eman den akordioari esker, prozedura judizialari amaiera eman zaio eta Fagor Kooperatiba Elkartearen esanetan "bientzat ona den akordio transakzional bat" lortu da.