Cata, Cevital, Ecomac eta Aristonek hobetuko dituzte eskaintzak

Orain arte Fagorreko aktiboak erosteko interesa agertu duten sei enpresetatik lauk agertu dute eskaintza hobetzeko interesa: Kataluniako Cata, Aljeriako Cevital, Txileko Ecomac eta Italiako Ariston dira horiek. Aurkeztutako eskaintzak "nahikoa onak" ez zirela-eta, eguaztenera arteko epea eman zuen epaileak eskaintza horiek hobetuko dituzten ala ez erabakitzeko. Hala, aipatutako laurek esan dute, eskaintzak hobetuko dituztela. Ez dutenak lehia horretan jarraituko dira Amica eta Taurus.

Donostiako Merkataritza Epaitegiak uztailaren 16ra arteko epea eman die lau enpresei Fagorren aktiboak erosi ahal izateko eskaintzak hobetzeko. Epaileak, hasierako eskaintzaren perimetroa hobetzeko aukera eman die, gainera.

Fagor markaren erabilera negoziatzen

Bestetik, Fagor marka erabili ahal izateko negoziazioetan jarraitzen du Fagor Taldeak Cata, Cevital eta Ecomac enpresekin. Taldeak Goienari jakitera eman dionez, Kataluniako Cata enpresarekin dagoeneko aurre-akordioa dute sinatuta. Lehenengo eskaintzak egiteko epea zabaldu zenerako sinatu zuten kataluniarrekin aurre-akordioa, epaileak azkenean euren alde egingo balu markaren lizentzia zein baldintzetan egingo litzatekeen adostuz.

Cevital enpresarekin ere badihardu Fagor Taldeak markaren gaineko negozioazioetan, baina oraindik ez dira adostasunera iritsi. Fagorretik gaineratu dute, epaileak eskaintzak hobetzeko eskaera egin ostean izan dutela Txileko Ecomac taldearen berri. Azken horrek Edesa marka gura duela, baina Fagor markarengatik ere interesa agertu duela adierazi dute. 

Ariston enpresari dagokionez, adierazi dute, enpresa italiarra ez dela oraindik eurekin harremanetan ipini.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.