Azken orduko bajak direla-eta, hasierako minutuetan Bergarakoak trabatu samar ibili ziren arren, itxura ona eman zuten lehenengo zatiaren amaieran, eta markagailuan aurretik jarrita (13-14) joan ziren aldageletara. "Normalean hegalean jokatzen duten Mikel Plazaola eta Iñigo Iparragirre falta zirela-eta, aurrez min hartuta zeudelako, azkenaldian asko jokatu barik zeuden beste bik bete behar izan dituzte horien lekuak. Dani Sevillanok egindako paseekin lortu dugu emaitza parekatzea", azaldu zuen Josetxo Muniategi entrenatzaileak partiduaren amaieran.
Bestelakoa izan zen, baina, bigarren zatia, Muniategiren esanetan, etxekoen joko trabatua izan zuena ezaugarri: "Defentsa aldatu egin dute legazpiarrek eta ez dugu jakin jokatzen. Azkeneko minutuetan bi golegatik galtzen genbiltzala kontraeraso baten bitartez partidua berdintzeko aukera bat izan dugu baina ez dugu gola egitea lortu".
Patiduko gakoak, atezainak
Emaitzan, atezainen lanek eragin handia izan zutela zioen Muniategik: "Biek jardun dute ondo, eurena hobeto ibili bada ere, akats gutxien egin duen taldeak irabazi du".
Emaitzari dagokionez helburua bete ez zuten arren, partiduan egotea lortu zutelako konforme zen Muniategi.
Bosgarren porrota jarraian
Gabonak aurretik, bigarren postuan zeuden sailkapenean, lehenengo taldetik 4 puntutara, hain zuzen ere. Urte berriarekin, baina, ez dute partidurik irabazteko aukerarik izan; hori horrela, helburuak aldatu behar izan ditu Bergarako taldeak: "Lehen igoera fasera pasatzeko lehenengo hiru postuetan egoteko aukerak genituen; orain, berriz, konfiantza eta joko ona berreskuratzea dira ditugun lehentasunak. Zaila bada ere, datorren astean Urdulizen irabazteak asko lagunduko liguke".
