Desafio oso parekatuaren ostean, Arkaitz Lizarraldek eta Alex Azkargortak irabazi dute proba 1981,4 kilo belar moztuta. Bigarren postuan gelditu dira Gorka Urrutia eta Andoni Urrutia 1855,6 gramo belar moztuta eta Ander Zugastik eta Alex Azkargortak 1848,8 kilo belar moztea lortu dute Asentzioko desafioan.
Lehenengo, trontzan hamabost talo moztu dute hiru taldeek, bost minutu pasatxoan. 1,95 metro bueltako enborra moztu behar izan dute, pago egurra.
Ondoren, segan egin behar izan dute; bikote bakoitzak hiru belar sail zituen mozteko. Proba guztia egiteko 45 minutu zituzten baina 43 minutu eta 13 segundoan gelditu dute. Izan ere, Gorka Urrutia eta Andoni Urrutiak osatutako bikoteak euren zelai sail guztia denbora horretan moztea lortu dute. Ander Zugasti eta Valentin Dolatxek ere oso maila ona erakutsi dute. "Normalean auzotarren arteko lehian maila kaxkarra ikusten da baina Asentzioko kasuan maila bikaina erakutsi dute. Trontzan harrituta gelditu naiz eta segan ere oso ondo ikasita etorri dira", adierazi du speaker lanetan ibili den Asteasuko Joxe Angel Sarasolak. Arkaitz Lizarralde irabazleak, bestetik, hauxe adierazi du: "Gerriko minarekin ibili gara amaiera aldera baina guztiok ibili gara nahiko parekatuta eta lan txukuna egin dugu denok". Parte-hartzaileei animoak ematen herritar ugari izan dira eta antolatzaile taldeko Miel Biain ere pozik zegoen "Oñatirako berria" izan den desafioak jende ugari erakarri duelako.
