"Herriko hainbat eragile eta elkartetako ordezkariekin egin ditugu bilerak protokolo hori zehazteko", jakinarazi du Myriam Beltran de Herediak, Udaleko Prebentzio teknikariak, eta gaineratu: "Elena Sagasetarekin, Clara Campoamor elkarteko gizarte langilearekin batera zehaztu dugu aurrerapen bat. Hori aurkeztuko dugu martitzenean, eta herritarren iradokizunak jasotzeko epea zabaldu".
Sagasetak dio, bestalde, ezinbestekoa dela halako jarraibide bat zehaztuta izatea: "Berdintasunaren alde jardun behar dute udalek, eta, gainera, horrekin erakusten du indarkeria matxista jasandakoen emakume eta umeenganako ardura". Garrantzitsua dela herritarrek ere protokoloarekin "bat egitea" dio. Eta gaineratu du erasoren bat jasandakoek bakarrik ez daudela sentituko dutela horrekin: "Tratu txarretan oinarritutako harreman horiek apurtzeko laguntza eska dezaketela ikusiko dute".
