Goizean herriko ekoizleek postuak jarri zituzten plazan, eta udaletxeko balkoitik tirolina bidez jaisteko aukera ere izan zuten gaztetxoek. Intxortako igoera herrikoia ere egin zen, plazatik Intxortara eta bueltan, kronometro bidez denborak hartuz. Gizonezkoetan Unax Agirre gailendu zen, eta emakumezkoetan Goiatz Agirrek marka berria ezarri zuen, 21 minutu eta 47 segundoko denborarekin.
Egunean zehar, aldarrikapen sozialak ere presente egon ziren. Elgeta–Palestina taldeak Genozidioari stop, Palestina askatu lelopean elkarretaratzea egin zuen eguerdian.
Patata-tortilla lehiaketa
Arratsaldean, Gazte Asanbladak antolatutako patata‑tortilla lehiaketa izan zen protagonista. Guztira hamasei taldek hartu zuten parte, eta tortilla onenaren zein originalenaren sariak 1975eko Kintuak taldeak eskuratu zituen. Bigarren eta hirugarren postuak Beheko Kale eta Kutrillu taldeek eskuratu zituzten, puntu berdinekin, baina zaporearen puntuazioak erabaki zuen hurrenkera. Intxortako Gudariak taldeak, berriz, tortilla txarrenaren saria jaso zuen.
Kontzertuek harrera ona
Egitaraua gauera arte luzatu zen, eta Espaloian eskainitako kontzertuek —Babesgabe, Apunta eta Ostiada Oi! taldeekin— amaiera biribila eman zioten egunari.
