Gaur eguerdian Estefania Beltran de Heredia Segurtasun sailburuak Koronabirusari buruzko egunero egiten duten prentsaurrekoan azaldu duenez, tokian tokiko nekazarien azokak galarazten dituen debekua bertan behera lagako du Eusko Jaurlaritzak datorren astetik aurrera. Pasa den apirilaren 8an debekatu zituen Jaurlaritzak merkatuak agindu bidez alarma egoera amaitu arte, "pertsonen joan-etorriak gutxitzea eta jende pilaketa saihesteko helburuz".
Beltran de Herediak azaldu duenez, osasunarekin eta higienearekin zerikusia duten eta indarrean dauden "neurri zorrotzak" bete beharko dira. Neurri horiek "osasun publikoarekin lotutako irizpideak" izango direla zehaztu du, "osasun publikoa zaintzen duten agintariek emandakoak".
Adierazpen bateratua
Baserritarren azokak debekatzeko erabakiak kritika ugari eta sektore zabal baten haserrea piztu du aste honetan. Bada, neurri horrekiko desadosatsuna erakutsi eta azoka eta merkatuak berriz ere zabaltzeko eskaria eginez, adierazpen bateratua kaleratu zuten atzo 60eragile inguruk; tartean Antzuolako Udala edota Arrasate eta Bergarako Ereindajan. Egunak aurrera egin hala asko izan ziren adierazpen hori babestu zutenak eta arratsalderako hirukoiztu egin zen babesa ematen zioten eragileen kopurua.
"Azoken beharra"
Jaurlaritzak azokak debekatu arren, normaltasunez egin dira gaur azokak herri askotan; tartean Oñati eta Bergaran. Goizetik jende ilarak sortu dira herri bietan; Oñatin Zubikoa kiroldegiko kantxa urdinean eta Bergaran ohiko tokian, Oxirondon. Ekoizleak, erostera joan diren herritarrak eta herri bateko zein besteko udal ordezkariak bat etorri dira eta "azoken beharra" dagoela adierazi dute.
