Jose Maria Ormaetxea hil da

Arrasateko mugimendu kooperatibistako sortzaileetakoa, 92 urte zituela hil da gaur arratsaldean. Besteak beste, gerora Fagor Etxetresnak izango zen Ulgor abiarazi zutenen artean egon zen, eta Mondragon Korporazioaren lehen presidentea ere izan zen. Hileta elizkizuna, uztailaren 22an, astelehena, izango da, 19:00etan, Arrasateko San Juan Bataiatzailearen parrokian.

Arrasateko mugimendu kooperatibistako sortzaileetako bat, Jose Maria Ormaetxea arrasatearra hil da gaur arratsaldean, 92 urte zituela. Herenegun ospitaleratu zuten Arrasaten, pneumonia baten ondorioz.

1926ko abenduaren 23an Arrasaten  jaioa, 14 urterekin sartu zen Aprendizen Eskolan eta 1941ean ezagutu zuen Jose Maria Arizmendiarrieta. 1952an, Union Cerrajeran lanean zebilela, Arrasateko Eskola Profesionalean egindako peritu kimiko ikasketak amaitu zituen Zaragozako Peritu Industrialen Eskolan azterketa egin ostean.

1956an Luis Usatorre, Jesus Larrañaga, Alfonso Gorroñogoitia, eta Javier Ortubayrekin batera Ulgor sortu zuen; gerora Fagor Etxetresnak izango zena. Bertako lehen gerentea izan zen. 1959an Laboral Kutxako zuzendari nagusi bihurtu zen, eta postu horretan egon zen 28 urtez. 1985ean, egungo Mondragon Korporazioaren kooperatiba organoak eratzen hasi zirenen, lehen presidente izendatu zuten. 1991an, bestalde, SPRIko presidenteorde kargua hartu zuen.

2016an Arizmendiarrieta Kristau Fundazioaren sustatzaileetako bat izan zen, eta ordutik baita bertako ohorezko presidente ere.

Aitorpen ugari

Bere ibilbidean zehar egindako lanagatik hainbat aitorpen jaso zituen: besteak beste, Eusko Jaurlaritzak ematen duen 'Lan Onari' saria; eta Mondragon Unibertsitateak banatzen duen Urrezko Domina, erakundea sortzeko emandako laguntzagatik. Merkataritza Bazkundeak XX. mendeko Gipuzkoako ekonomiari ekarpen handiena egin dioten hamar enpresarien artean sartu zuen.

Erlazionatuak

Markel Olanok "tristura eta minik sakonena" adierazi du Jose Maria Ormaetxearen heriotzagatik

Arrasate

"Euskal Kooperatibismoaren sortzaileen ekarpen itzela kontuan hartu gabe ezin da ulertu Gipuzkoaren gaur egungo garapen ekonomiko eta soziala", gai...
Jose Maria Ormaetxea eta Alfonso Gorroñogoitia omendu dituzte Arizmendiarrietaren Lagunak Elkartekoek

Arrasate

Arrasateko mugimendu kooperatiboko bi fundatzailek, Jose Maria Ormaetxeak eta Alfonso Gorroñogoitiak, bizitza osoan zehar balio kooperatiboa...

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira.

TELEGRAM: Batu zaitez @GoienaAlbisteak kanalera.