Poztasunez hartu zuten atzo Donostiako epaitegi batek argitaratu zuen epaia. Izan ere, Gonzalezen ustez, orain arte, Kutxabankek herritarrei iruzur egin die, eta epaiaren bitartez erakundearen jarrera agerian geratu da. Nahiz eta epaia Gipuzkoako IRPH Stop plataformako kideen aldekoa izan, oraindik Kutxabankek helegitea aurkez dezake. Hori dela eta, Salva Gonzalezen ustetan, garaipenaren lehenengo pausoa baino ez da hau, eta oraindik bidea dago egiteke. Europako 93/13/CEE direktiban oinarritzen da epaia, eta Stop Kaleratzeen ustez, Europako araua izateak berme handiagoa ematen dio auziari; sententziak aurrera eginez gero, gehiegizko klausulak bertan behera geldituko lirateke.
Gonzalezek dio salaketak jartzea garrantzitsua dela, eta hori dela konponbide bakarra. Beraz, Stop Kaleratzeak elkartetik kaltetutako herritarrak salaketa jartzera animatu nahi dituzte. Izan ere, Gonzalezen iritziz, kaltetuen gutxiengoak soilik salatzen du gehiegikeria hori.
