Liburua idaztea bide luze bezain aberatsa izan dela zioen, eta herriaren laguntza izan duela horretan. Eskertuta agertu da gertu izan dituen lagunei, horien artean, Xabier Agirre, Bingen de Pedro, Antton Arrillaga eta Josu Okina.
Bergarako margolariaren jaiotzaren mendeurrena borobiltzera dator liburua eta artea zabaltzeko egindako lana aitortu gura izan dio Elkoroberezibarrek; izenburuak dioen bezala, artearen normaltasuna ekarri zuelako herrira. Eta gogorarazi du haren koadro bat Bergarako ia etxe guztietan dagoela.
Gertuko pertsona ere izan zen Bergarako pintorea eta horren erakusgarri izan dira orain arte antolatutako ekitaldiek zein zapatukoak izan duten harrera beroa.
Okinak 4.000 koadro margotu zituen, eta zapatuko aurkezpenean horietako bi erakutsi zituzten. Goenkale kalea lana, 1968an margotutakoa; eta Okinaren ikasle izan zen Frantxulet antzuolarraren erretratua. Okinaren beste hainbat koadro jarriko dituzte ikusgai urriaren 3an zabalduko duten erakusketan.
Okinaren obra antologikoaren gaineko erakusketa ikusgai egongo da urriaren 3tik 26ra bitartean, Bergarako Aroztegi aretoan.
