Angiozar Bailarako Batzarrak bizilagunen nahi orokorra zein den jakiteko antolatu du herri galdeketa eta honako hauek izan dira emaitzak:
Emaitzak:
Errolda: 208
Bozketak: 145
Abstentzioa: 64
- 1. Galdera: Angiozar Bailarako Batzarrak hasi duen Bergarako udalarekiko deszentralizazio prozesuarekin jarraitzeko asmoarekin bat egiten duzu?
Bai: 130
Ez: 11
Zuriak: 3
Baliogabeak: 1
- 2. Galdera: Zapatarikua etxea, Garitano familiak dohaintzan eman nahi duen etxea, “Angiozar Jorratzen Garapen Elkartearen” bidez angiozartarrok jabetzan hartzea ondo ikusten duzu?
Bai: 116
Ez: 25
Zuriak: 3
Baliogabeak: 1
Mila Elortza: "Bizilagunen babesa badugu"
Tokiko entitate txiki izateko prozesua stand by egoeran badago ere, Angiozarko alkate Mila Elortzak azpimarratu du bailara barrura begirako lanketa bat izan dela: "Bizilagunen babesa badugu lanean jarraitzeko. Herri batzarrean edo Angiozar jorratzen ekimenean mugitu izan garenon ametsa izan da azken urteetan Angiozar burujabeago bat lortzea. Entitate txiki izatera helduko garen ez dakit, baina formulak bilatu nahi ditugu gure bailararen gaineko ardura gehiago izan dezagun".
Zapaturikua etxearen bueltan, esker on hitzak izan ditu Garitano-Larrañaga familiarendako lau solairuko eraikin bat dohaintzan uztea erabaki dutelako: "Berba egiteke dago baina ametsak baditugu buruan eraikin horri begira; sekulako eraikina da, eta herri batzarrarekin batera adostuko dugu ze erabilera eman ahal zaion", dio Elortzak.