Aitortza partekatu nahi izan zuten, Debagoieneko beste herri batzuetako memoriaren alde lan egiten duten lagunentzat ere badela nabarmenduta. Horrez gain, esker hitzak izan zituzten Dragones, Saseta, Amaiur, Amuategi, Loiola eta bestelako batailoietan kolpe militarrari aurre egin zietenei.
Maider Morras Arrasateko alkateak ere hartu zuen hitza, alboan zituela Bizikidetza Batzordeko kide diren Jasone Giraldo, Agurne Juldain, Aritz Murua eta Eva Abuin. Adierazpen instituzionala irakurri zuen, elkarteak memoria berreskuratzearen alde egindako lana nabarmenduta. Haren arabera, ibilbide luzea eta emankorra izan du.