Modu bero eta hunkigarrian agurtu du Arrasateko herriak Arbolapetako gaztainondoa. Arrasatearren artean arbola berezia denaren seinale, plazatxoa jendez bete da: "Bizitzeko memoria garrantzitsua den bezala, etorkizuna eraikitzeko zuhaitzak behar dira. Ez dugu nahi zuhaitzik gabeko etorkizunik, ez dugu nahi memoria gabeko herririk", adierazi du omenaldian hitza hartu duen herritar batek. Omenaldian parte hartu dute txalapartariek, txistulariek, dantzariek eta Txorbela otxoteak. Amaieran umeek gaztaina-erreak jateko aukera izan dute. [ARGAZKIAK]
Arrasateko historiaren "lekuko" dela ere gaineratu dute: "Arbola honek 114 urte ditu eta beraz, Arrasateko historiaren lekuko eta konplize isila da. Herri honen borroka gordetzen du bere baitan, gure bizipoz eta sufrimenduak, urte beteak eta garai latzak, jasan ditugun eraso eta ekaitzak".
Herritar talde batek antolatutako omenaldian, gogoratu dute "atseden tokia" izan dela Arbolapeta: "Gauza asko ikusi ditu zuhaitz honek". Azken orduan eta ia modu inprobisatuan jende asko erakarri du omenaldiak eta txalapartariak, txistulariak eta dantzariak izan dira. Gainera, lore eskaintza egin diote zenbait herritarrek eta umeek gaztaina erreak jateko aukera izan dute
