Gorka Valle entrenatzailea pozik dago taldeak egin duen lanarekin. "Taldeak lan handia egin du, aukera asko izan ditugu eta intentsitatearekin jokatu dugu", azaldu du partidu amaieran. Lehenengo zatian oso joko ona egin dute aretxabaletarrek, aukera asko izan dituzte baina bat bera ere ez da sareetan sartu. Gainera, alde izan dituzten bi penaltiak Martuteneko atezainak geratu ditu.
Bigarren zatian ere indartsu atera dira jokalariak. Hala ere, intentsitate pixka bat galdu dute minutuak aurrera joan ahala; aldaketak eginda, baina, berriro ere partiduaren jabetza hartu dute.
Lidergoa galdu dute
Gaurko partiduaren ostean, Aretxabaleta bigarren postuan dago 41 punturekin. Ondarroako Aurrera jarri da lehenengo postuan – 4-0 irabazi dute Touring-en aurka. "Oraindik liga luzea da, 15 jardunaldi geratzen dira", azaldu du Vallek.
Zarautz-Aretxabaleta
Datorren astean Aretxabaletak Zarautzera egin beharko du bisita. "Hona etorri zirenean atzean sartu ziren; ez dakiguna da euren etxean zelan jokatuko duten", dio Valle entrenatzaileak.
