Abenduaren erdialdera argitaratu zuten EAEko aldizkari ofizialean Trekutz parke eolikoaren proiektua, Cilda Energu SLU enpresak eskatu duena, eta hor jasotakoaren arabera ingurumenean eragin handia izango duela salatzen dute Meaka-Irimo plataformako kideek: "Bi aerosorgailuak jartzeko egin beharreko lanek lur-mugimendu handia ekarriko dute, iturburuak eta animaliak kaltetzeko arriskua... Eragin handia izango du Antzuolarendako hain garrantzitsua den naturgunean".
Era berean, krisi energetikoaren aurrean energia berriztagarriak beharrezkoak direla, baina beste alternatiba batzuk aztertzeko eskatzen dute herri plataformako kideek: "Ikusten dugu proiektu hau azkar eta presaka etorri dela Antzuolara, herritarren iritzia kontuan hartu gabe. beste alternatiba batzuk ere aztertu egin behar direla uste dugu: plaka fotoboltaikoak, martxan dauden kontsumo taldeak... gauzka ondo aztertu behar dira".
Gauzak horrela, asteotan hainbat hitzaldi antolatu dituzte, baita bilerak egin ere. Eta proiektuari alegazioak aurkezteko epea urtarrilaren 31ra arte zabalik dagoela ikusita, asteartean, San Esteban egunean, informazioa banatzen eta sinadurak batzen ere ibili ziren. Abenduaren 31rako, urtezahar egunerako, bestalde, Irimorako mendi martxan antolatu dute.
