Porrotak ez du inoiz zapore gozorik, ezta txapelketako lehenengo jardunaldian ere, baina txarretik ona ere atera daiteke eta hala egin dute oraingoan antzuolarrek: "Noski ez dela ona horrela hastea, baina, ez genuen partidua horren sentsazio txarrarekin amaitu", dio Jon Muruamendiarazek, Antzuolako entrenatzaileak.
Izan ere, ordiziarrek baino presentzia handiagoa izan zuten debagoiendarrek zelaian, asmatzen jakin izan ez bazuten ere: "Emaitzak ez ditu gure sentsazioak islatzen", gaineratu du.
35. minutuan jaso zuten antzuolarrek lehenengo gola eta atsedenaldira 2-0ekoarekin joan ziren. Hala ere, partiduari buelta emateko esperantzarekin atera ziren bigarrenean. Berehala etorri zen ordiziarrena eta zapuztu ziren itxaropen guztiak. Penaltiz sartu zuen Antzuolak partidua bukatzear zela, partiduko gol bakarra.
Helburua, mantentzea
Asmo horrekin hasi du Antzuolak txapelketa: "Jokalari gutxiko taldea gara eta horren asko baldintzatzen gaitu", dio Muruamendiarazek. Datorren astean etxean jokatuko dute, Hernaniren kontra.
