Oñatiko talde ezaguna iaz itzuli zen oholtzetara, hamazazpi urteren ondoren, Denboraren orbainak, estudioko hirugarren lana, argitaratuta.
Disko hori aurkezteko biran murgilduta daude azken hilabeteetan. Hala, ekainean, Abanto-Zierbenan eta Zamoran izango dira; eta uztailean, Barcelona Rock Fest (Santa Coloma de Gramenet) eta Rock Imperiun (Cartagena) jaialdietan. Debagoienean, baina, ez dute oraindik kontzerturik eman eta Oñatin, etxean, egingo dute estreinaldia, irailaren 26an.
Bigarren itzulera
1993an sortu zuten taldea Aitor Uriarte (ahotsa), Joxemari Azpitarte (baxua), Iker Martinez de Zuazo (gitarra) eta Gorka Lazkano (bateria) oñatiarrek, eta 1996an argitaratu zuten lehendabiziko diskoa: Kontzientzia ala infernua (Oihuka).
1999an erretiratu egin zen baina 2007an bueltatu ere bai; orduko hartan, hamabost kontzertu egin zituzten –Debagoienean Eskoriatzan egin zuten lehendabizi, otsailaren 9an eta, ondoren, Oñatin, maiatzaren 30ean–, eta Hellmuga izeneko lana kaleratu zuten zuzeneko horiekin.
Jatorrizko lau taldekideak aritu ziren lehendabiziko itzulera hartan, baina, oraingoan, Martinez de Zuazo ez da oholtza gainean izango.