Hatortxu Rock jaialdiak sare sozialetan jakinarazi duenez, bueltan da Latzen taldea: "1999an utzi eta 2007an agur bira berezi bat egiteko itzuli ziren. Hamazazpi urteren ondoren, bueltan dira oñatiarrak, eta Hatortxu Rocken izango dira". Hain zuzen, Bigarren itzulera eguna izendatu dute gaurkoa jaialdiaren antolatzaileek, datozen orduetan iragarriko baitituzte jaialdiaren azkeneko edizioan izango diren lau talde –tartean dira Latzen eta Skatu, Iruñean 2007an sortu zen ska zortzikotea–.
Oñatiko Latzen heavy metal taldea 1993an sortu zuten Aitor Uriarte (ahotsa), Joxemari Azpitarte (baxua), Iker Martinez de Zuazo (gitarra) eta Gorka Lazkano (bateria) oñatiarrek, eta 1996an argitaratu zuten lehendabiziko diskoa: Kontzientzia ala infernua (Oihuka). Ordu hartarako, talde entzutetsua zen, baina oihartzun handiagoa lortu zuten disko horren ondoren, Laztana abestiak izandako arrakastarengatik, besteak beste. Bigarren diskoa, berriz, 1998an argitaratu zuten: Ardi larruz (Oihuka). Azkenean, 1999an desegin zen.
Taldeak, ordea, ez du lehendabiziko itzulera, 2007an egin baitzuen lehena; ordu hartan, hamabost kontzertu egin zituzten –Debagoienean Eskoriatzan egin zuten lehendabizi, otsailaren 9an eta, ondoren, Oñatin, maiatzaren 30ean–, eta Hellmuga izeneko lana kaleratu zuten zuzeneko horiekin. Jatorrizko lau taldekideak aritu ziren lehendabiziko itzulera hartan, baina, oraingoan, Martinez de Zuazo ez da oholtza gainean izango.
Debagoieneko talde gehiago
Latzen ez da Hatortxu Rock jaialdian arituko den Debagoieneko talde bakarra izango, oholtza gainean izango baitira Brigade Loco, Añube, Never Surrender eta Sukena ere.
