Izan ere, 100.000 txartel banatu dituzte Oñatiko komertzioetan erosketak egindakoen artean eta 102 sari eman dituzte, Errege eguneko loteriako zenbaki saridunak erreferentzia gisa hartuta: 1.000, 600 eta 400 euroko hiru sari nagusi, eta 30na euroko 99. 4.970 euro, guztira. Pozik azaldu da Txanda elkarteko zuzendaritza batzordeko kide Argiloain Perosterena baina, oraindik saridun guztiak azaldu ez direla-eta, dagokien txartelarekin aurkezteko otsailaren 6ra arteko epea dutela ekarri du gogora.
Mari Angeles Vazquezek eraman du sari potoloena eta gustura azaldu da, "inoiz ezer tokatu ez eta oraingoan opari ederra eraman" duela esanez. "Herriko komertzio guztietan, denetan apur bat, gastatzea" da bere asmoa.
"Argia eta bizitza herriari"
Perosterenaren esanetan, beharrezkoak dira horrelako kanpainak herriko komertzioa bultzatzeko, eta herritarrek ere pozik hartzen dituzte. Helburua da bertan erosten duena saritzea eta hala egiten ez duena ere animatzea, kanpaina hauen bitartez. Denaren beharra dutela gaineratu du: "Gure lana da, baina herriari argia eta bizitza ematen dizkiogu eta lana sortzen dugu. Bertan bertakoa kontsumitzea garrantzitsua da. Pena izango litzateke lokalak itxita ikustea, hutsik geratuko lirateke herriak".
Dwingi Dwingi taldeak Ez deixen txapau lelopean egindako bideoarekin eman zion hasiera Gabonetako kanpainari Txanda elkarteak -umoretik, baina errealitatea eta helburua ahaztu gabe- eta gaurko sari banaketarekin itxi du. Salmentak ondo joan direla adierazi du Perosterenak, nahiz eta lehenago erosten ere hasten den jendea eta salmentak sakabanatu egiten diren apur bat denboran. Merkealdia, berriz, nahiko lasai hasi dela azaldu du; lehen egunok opariak aldatzeko izan direla, nagusiki.
