Aita Madina kalean, bi tabernaren artean, kalean, hasi zen erasoa urtarrilaren 1eko 06:30ak inguruan. Ertzaintzak adierazi duenez, lekukoen arabera, bi pertsonaren arteko eztabaida hasi zen lehenengo eta, ondoren, borroka hasi zen. Inplikatuetako baten lagunek beste inplikatua banandu eta laguntzen saiatu zirenean, ustezko erasotzaileak labana bat atera eta bost pertsona zauritu zituen arma zuriarekin; lau gizonezko eta emakumezko bat. Arrasateko Ospitalera eraman zituzten, eta horietako bati hankan ebakuntza egin behar izan diote.
Ertzaintzaren arabera, biktimek lortu zuten 32 urteko ustezko erasotzailea desarmatzea. Hasiera batean ihes egin zuen, baina, azkenean, ertzain patruila batek atxilotu zuen Foruen Enparantza inguruan, Kale Barria hasieran. Ertzain-etxera eraman zuten akusatua, lesio delitua leporatuta, eta ikerketa abiatu du gertatutakoa argitzeko asmoz. Han jarraitzen du.
Oñatiko Udaletik, Izaro Elorza alkateak adierazi du erasoaren ingurukoak argitzeko lanean jarraitzen dutela, zabalik jarraitzen duela ikerketak; era berean, "ezbehar puntual" hori gaitzetsi du, eta elkartasuna adierazi die zauritutako pertsonei.
