Hala, maiatzaren 1a iritsi eta Arantzazuko belardietako behor kuadrilla Urbiara eroan ditu Ruper Altzelaik. Ondo baino hobeto dakite behorrek bidea eta gogotsu, aise heldu dira Urbiako zelaietara.
Inoiz baino ederrago dago natura; negu suabea egin du eta naturaren kolore berdea ezohikoa dela diote Urbia inguruan dabiltzan artzainek. Bitxilore zuriz estalita daude zelaiak, 7 astez inortxok ere zapaldu gabe. Baina orain, akabo isiltasuna eta orain arte mendi eta larreek izan dute bake ezohikoa.
Ardiak ere belar freskoaren gosez daude. Gesaltza baserriko 150 buruko artaldeak baina, ekainera arte itxaron beharko duela azaldu du Maialen Madina artzainak.
Bizkaian, ordea, San Isidro egunean maiatzaren 15ean egingo dute mendi-larreen irekiera. Aldunditik gogorarazi dute abeltzainak oso direla beharrezkoak larre hauen kudeaketa egokirako eta ondore, mendi hauek gizarte osoaren gozamenerako izan daitezen.
