"Momentu berezia izan zen, eta hala izateko bi arrazoi nagusi izan ziren. Batetik, oso polita da zure herrian zure pelikula aurkeztea, gertukoen, ezagunen, lagunen eta familiakoen aurrean, eta, bestetik, Oñatiko Udalaren partetik jasotako omenaldiagatik oso eskertuta nago. Aretoa ia beteta, Joseba Lasagabaster bertsolariaren bertso bat plaka batean jaso nuen, eta Izaro Elortza alkatearen eta kultura zinegotziaren hitzak ere. Ekitaldia xumea eta goxoa izan zen, gertukoa", adierazi du Aitor Arregi zinemagile oñatiarrak.
Emanaldi eta aurkezpen gehiago
Atzo, egubakoitza, 19:30ean eta 22:30ean izan zen filma ikusteko aukera kultura etxeko zine aretoan, gaur, zapatua, ere, toki eta ordu berean eskainiko dituzte beste bi emanaldi, eta baita bihar, domeka eta astelehenean ere. Domekako bi emanaldietan Aitor Arregi zuzendariak aurkeztuko du filma eta iluntzeko emanaldiaren ondoren, solasaldi txiki bat egingo dutela aurreratu du zine zuzendariak.
Oñatin gainera, Bergaran eta Arrasaten ere izango da La Trinchera infinita filma ikusteko aukera: Bergarako Seminarixoan, azaroaren 8an, 10ean eta 11n, eta Arrasateko Amaia antzokian, azaroaren 16an eta 17an.