Eskoriatzako Lete auzoko iturriaren alboan egin zioten omenaldia Arkauzi; indar faxistek hil zuten lehenengo eskoriatzarrari. Memoria Bizia taldekoek duela 90 urteko gertakari horiek gogora ekarri zituzten, eta ostean, Arkauzen ondorengo Ane Eraña Lezetak azaldu zuen bere aitonaren anaia Lete auzoko baserri batean bizi zen 15 urteko mutil gaztea zela, baserri mundutik bizi zen herritar xume bat. Halako omenaldiak garrantzitsuak direla aitortu zuen Erañak: "Omenaldia bere memoria ez galtzeko da. Apur bat hona ekartzeko, kontatzeko eta jendeak ikusteko zer gertatu den, eta ez geratzeko hor atzean ahaztuta".
Memoria Antifaxista Bizia taldeko kideek antolatutako ekitaldia izan zen, memoria berreskuratzea dute helburu, eta domekan Luciano Arkauzi omenaldia egiteaz gain, beste bi plaka jarri zituzten. Ekintza gehiago iragarri dituzte datozen hilabeteetarako; Urria Odoltsua esaterako.
Memoria ekitaldia amaitzeko, 13:00etan, Herriko Plazan, 36ko gerran sortutako eta konposatutako kantuak ekarriko zituen gogora Joseba Tapiak, Errekan Gora ekimenak antolatutako kontzertuan.
