Usurbildik ekarri zituzten azokara loreak, hango Urtinea Lorak izeneko mintegitik, eta gelditu barik ibili ziren goiz guztian jendeari eskatutakoa ematen eta euren zalantzak argitzen ere. Loreak ez ezik, lur-zakuak ere askok eroan zituzten. Gustukoenak, eta bakoitzaren balkoiak apaintzeko aproposenak izan daitezkeen landareak erostera joan ziren eskoriatzarrak zapatuan plazara. Eta gehien saldutakoak izan ziren limoiondoak eta margaritaren familiakoak diren dimorfoteca landareak.
Azken urteetan bezala, maiatzaren hasierarekin batera antolatu zuen lore azoka Axtroki merkatarien elkarteak. Aurreko hilabeteetan herriko dendetako zigiluak lortzen ibili ziren herritarrak; landareengandik trukatzeko txartelak lortu zituzten zigilu horiekin.
Urtean zehar hiru ekintza handi antolatzen ditu Axtroki merkatarien elkarteak: iraileko saiheski-jana, Gabonetako zozketa eta maiatzeko lore azoka. Azken hau, egonkortu egin dela zioten, herritarren "harrera ona" ikusita.
