Tramu berri eta estuari aurre egiteko gertu daude pilotuak

Imanol Beloki Unamuno 2022ko uzt. 13a, 15:27

Zapatuan izango da Eskomotor taldeak antolatutako Eskoriatzako lehenengo rallysprinta. Lau mangetan banatuta egongo da: tramu berdinean, bi alde baterako noranzkoan eta beste bi beste aldera. Aretxabaleta eta Eskoriatza arteko auzo-bide artean, zortzi kilometro guztira izango ditu manga bakoitzak, eta parte hartzen 50 pilotu aurreikusten dituzte.

Honakoa izango da ibilbidea:

Lehenengo bi mangak: Aretxabaletatik Eskoriatzara bitartean, Mendiolako lehenengo aldapatik hasi –Aretxabaletako Bainuetxe industrialdea–, Lete, Eraña, Bolibar, eta Agiñatik pasata, Atxorrotxeko zementuzko bidetik behera, helmuga bertan izanda.

Bigarren bi mangak: Eskoriatzako plazatik irtenda, aurkako norabidean gorantza atera, eta ezkerrera eginda, Namaste belar-dendatik gora, depositu zaharretik gora, Atxorrotxeko zementuzko bidetik gora, Bolibar, Eraña, Lete eta Mendiolan amaituta.