Rallysprinta lau mangetan banatuta egongo da: "Orain arte hiru manga egiten ziren, baina Federazioko bileran erabaki zen lau egitea, tramu berdinean, bi alde baterako noranzkoan eta beste bi beste aldera. Hori horrela, lehenengo bi mangak hala izango dira, Aretxabaletatik Eskoriatzara bitartean, Mendiolako lehenengo aldapatik hasi –Aretxabaletako Bainuetxe industrialdea–, Lete, Eraña, Bolibar, eta Agiñatik pasata, Atxorrotxeko zementuzko bidetik behera, helmuga bertan izanda. Hurrengoko bi mangak, berriz, Eskoriatzako plazatik irtenda, aurkako norabidean gorantza atera, eta ezkerrera eginda, Namaste belar-dendatik gora, depositu zaharretik gora, Atxorrotxeko zementuzko bidetik gora, Bolibar, Eraña, Lete eta Mendiolan amaituta". Hala, zortzi kilometroko bidea egingo dute Aretxabaleta eta Eskoriatza herriak hartuz, eta Eskoriatzako elizateetako bideak ere balioan jarriko dituzte, bide batez.
Portasolgo jaiak
Bi mangen artean autoak ikusgai ere izango dira, eta Aretxabaletako Portasol auzoko jaiak izanda, erakusgai ere jarriko dituztela autoak adierazi dute antolatzaileek. Lasterketaren atsedenaldian aretxabaletan ikusgai jarri ostean, lasterketa amaitzean, berriz, Fernando Eskoriatza plazan ere izango dira ikusgai auto guztiak.
Diru-bilketa prozesuan
Diru pixka bat ateratzeko asmoz, kamiseta batzuk atera dituzte antolatzaileek, 15 eurotan. Eskoriatzako eta Aretxabaletako hainbat tabernetan jarri nahi dituzte salgai, eta horrekin batera, egunean bertan, Fernando Eskoriatza plazan, stand batean izango dira kamisetak salgai.
