Mugimendua egon zen martitzen arratsaldean Eskoriatzako udaletxean. 17:30ean, Arizmendiko Almen guneko eta Luis Ezeiza ikastetxeko neska-mutilen bisita jaso zuten udal ordezkariek; ikasturtean landutakoaren berri eta proposamenak aurkeztu zizkieten. Jarraian, osoko bilkura mamitsuari egin zion aurre udalbatzak. Hainbat diru laguntza eta lankidetza hitzarmen onartu ostean, Aitor Urrutia zinegotzi jeltzaleak iragarri zuen kargua uzten duela, zirkunstantzia pertsonalak tarteko.
