Atez atekoa bertan behera uzteko eskatu dute

Manifestazio eta mozio bitartez joan den domekan abiarazitako atez ateko sistema bertan behera utz dezaten eskatu dute 100-200 bat eskoriatzarrek, antolatzaileen esanetan. Manifestazioa bukatu ondoren, (19:00) osoko bilkurara joan dira Eskoriatza Garbia plataformako hainbat ordezkari, mozioa aurkeztera. "Herritarren berba errespeta dezaten" gura dute, eta otsaileko galdeketaren emaitza eman diote alkateari.

18:00etan abiatu da manifestazioa, Eskoriatzako bi puntutatik: Intxaurtxuetako partxisaren plazatik, batetik, eta Aranburuzabala kaleko autobus geralekutik, bestetik. Eta bi adarrek bat egin dute Fernando Eskoriatza plazan. Txilibituek lagunduta, aldarrikapen zaratatsua egin dute.

Antolatzaileen arabera, 100-200 bat herritarrek bat egin zuten protesta ekimen horrekin, eta emaitzaren balorazio positiboa egin dute, herritarren aurkako "presioek" halakoetan eragina dutelako, euren esanetan.

Igeldo eta Mutriku

Manifestazioaren amaieran, eta osoko bilkurara igo aurretik, komunikatua irakurri dute antolatzaileek, labur esanda, "herritarren berba errespeta dezaten" eskatuz eta joan den domekan abiarazitako atez ateko hondakinen bilketa sistema bertan behera utz dezaten aldarrikatuz.

Eta hori aldarrikatzeko, Igeldon egindako herri galdeketa eta Mutrikun egingo dena jarri dituzte adibide moduan, baita Gipuzkoako Foru Aldundiak herritarren parte-hartzeari ematen dion garrantzia ere.

"Otsailaren 23an Eskoriatzan egindako herri galdeketako emaitza zuzenean alkateari ematea da helburua, herritarren parte-hartze zuzenaren adibide moduan, eta haien berba errespeta dezatela da guk gura duguna eta eskatu dioguna,", azaldu du Rafa Salidok, Eskoriatza Garbia plataformako kideak.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.