Estatu guztiko 16-17 urte bitarteko 40 haurrek eman dute izena 'Ruta al exilio' udaleku ibiltarian, eta hamalau begiralek koordinatuta, eguaztenean abiatu zen egitasmoa Bilbotik. Egunean bertan Elgetara heldu zen taldea, eta, bakoitza bere estera eta lo-zakuarekin, ibilbideko lehen hiru gauak herriko gimnasioan igarotzen ari da taldea.
Elgeta da udalekuko parte hartzaileen lehen lo-lekua, eta egunotan hainbat jarduera egin dituzte 1936ko Espainiako Gerra Zibilaren bueltako testuinguru historikoarekin lotuta. Esaterako, atzo, eguena, lemoako lubakiak bisitatu zituzten, eta zapatura arte herri inguruan egongo dira hainbat tailer eta jarduera egiten: "Adibidez, gaur goizean, dantzarekin eta gorputz-mugimenduekin lotutako tailer bat egin dugu, eta parte-hartzaileei hainbat teknika erakutsi dizkiegu memoriarekin lotutako mezuak zabaltzeko", azaldu du Ander Villacianek, 'Ruta al exilio' proiektuko pedagogia arduradunak.
Historiaren kontakizuna bertatik bertara
Hain zuzen, bertakotasunean egiten du proiektuak azpimarra, eta "kontzientzia politikoa eta antifaxismoa sustatzeko" ibilbidean ikusiko dituzten memoria guneetara bertaratzea "oso garrantzitsua" dela adierazi du Villacianek: "Pentsatzen dugu aisiaren, tailerren, adierazpen artistikoen eta sormen bidezko ekintzen bitartez lortu dezakegula gazteek haien bizipenen bitartez sentitzea zer nolako garrantzia duten gure arbasoek sinisten zituzten ideia horiek defendatzea".
Elgetatik Gernikara
Gaur Elgetan igaroko dute azken gaua, eta bihar goizean Gernikara abiatuko da taldea. Ondoren, Bizkaiako herrietan egongo dira astelehenera arte, eta jarraian Nafarroara joango da taldea. Ondorengo ibilaldian, besteak beste, Nafarroako Ezkaba mendiko San Kristobal gotorlekua edo Frantzia mendebaldeko Gurs herriko kontzentrazio-esparrua bisitatuko dituzte udalekuko kideek.
