Kutsatze arriskua murrizteko oso zorrotza da behi-azienden mugimendurako eta garraiorako arautegia, eta debekatuta dago esplotazio desberdinetako abelgorriak elkartzea. Neurri horrek zuzenean eragiten zuen Elgetako ganadu ferian. "Idiak ekartzen dira esplotazio askotakoak eta hainbat etxetakoak, 40-60 etxetakoak. Neurria errespetatzeko aurten etxe bakarrekoak izango dira. Udal ordezkariekin ere egon ginen eta hala adostu, pena izango litzatekeelako feria-lekua hutsik izatea", adierazi du Julen Beretxinaga antolatzaileak.
Barrenenguako abelgorriekin batera azokan egongo diren gainerako animaliak ere herriko abeltzainenak izango dira: Jose Ramon Sarasuaren mandoa eta ahuntzak, Garbiñe Ormaetxearen ardiak, Roberto Basauriren behorrak eta astoak, Pello Bilbaoren ardiak eta ahuntzak, Etor Telleriaren ardiak eta astoak eta Iñaki Izagirreren ardiak eta ahuntzak. Badakite beste urte batzuetan baino ganadu gutxiago izango dela, baina elkar batzeko ahalegina egingo dute.
Gainera, behi-azienda guztiak herrigunera kamioian eraman beharrean, horietako zenbait oinez eramango dituzte plazara. Keinu bat izango da, abeltzainek bizi duten egoera gogorra gogora ekartzeko. Aurreikusten dute goizeko 10:30ak aldera iritsiko direla Elgetara.
