Antzeztutako bisita gidatuarekin abiarazi zuten egitaraua, Andra Mari plazan; eta Mendizaleen plazan, Salbador ermitan eta Asentzioko lubakietan egin zituzten geldialdiak. Ikusle mordoa bertaratu zen eta, eguraldi ona bidelagun zutela, iraganeko zenbait pertsonaia ezagutzeko aukera izan zuten ibilbidean zehar, baita 1937ko erasoen errekreazio bat zuzenean ikusteko ere.
Behin bisita gidatu antzeztua bukatuta, ekitaldiaren momentua iritsi zen. Gaizka Morales elgetarrak dantzan egin zuen –lehenengo aldiz profesional moduan herrian, 18 urterekin kanpora irten zenetik–, eta Unai Telleria herrikide eta diseinatzailearen jantzi bat eraman zuen: modu askotara jantzi daitekeen eta ikurrinaren koloreak dituen kamiseta hirukoitz bat. Dantza zein jantzia espresuki sortu zituzten ekitaldirako, ilusio handiz, hitzorduaren berezitasuna kontuan izanik.
Datozen egunetarako ere bada ekitaldirik: Eñaut Elorrietak bakarkako emanaldia egingo du urriaren 10ean, Espaloian, 22:00etan. Jokin Oregi Sortwo artistak, berriz, horma-irudia egingo du, memoria historikoaren interpretazio zentroaren fatxadan.
