Lehenengo aldiz, Goienatik porra egin da eta debagoiendarrek aukera dute bertan parte hartzeko. Ekimenak erantzun oso ona izan du. Zazpi egun da martxan jarri zela eta denbora tarte horretan 280 lagunek baino gehiagok egin dute. Itzulera partiduaren emaitza eta finalera ze talde pasako den asmatzea eskatzen da porran.
Oraingoz, Realzaleak dira gehiengoa porran baina martxoaren 4ra arte epea dago parte hartzeko. Saria ere badu porrak. Asmatzen dutenen artean zozketa egingo da eta sarituek Realaren eta Osasunaren arteko derbia Anoetako premium gunetik ikusteko aukera izango dute.
Debagoieneko zale txuri-urdinek eta zuri-gorriek iritzi eta pronostiko ezberdinak dituzte hitzordu handirako egun gutxi faltan. Zaleak baikor azaldu dira, bakoitza bere taldearen aukeretan sinetsita. Derbietan ohikoa den bezala, giroa ezin hobea espero da Donostian, bi taldeen arteko harreman ona berretsiz.
