"Palestinan aspaldi hasitako sarraskia gero eta luzeagoa eta bortitzagoa dela ikusita, eta instituzioen pasibotasunaren eta konplizitatearen aurrean, ezinbestekoa ikusten dugu gizarte zibilaren erantzuna. Horretarako, Debagoieneko herri guztietako Palestinaren aldeko taldeek erantzun amankomun bat ematea erabaki dugu", adierazi dute.
Sortu berri duten sarea "mugimendu zabala, irekia eta parte-hartzailea" dela gaineratu dute, "Palestinaren aurkako genozidioa salatzera eta bistaratzera" datorrena, "sarraskia geldiarazteko eskura dituen tresna guztiak erabiliko" dituena, "israeldar jatorriko produktuei boikota egitea bultzatuko" duena, "enpresa eta erakundeei Israelekin harreman komertzial eta politikoak etetea exijituko" diona, eta "gizartea plazara ateratzeko eta denon artean Palestinaren aldeko oihu ozenena egiteko balioko" duena.
La Hayako auzitegiari eskatu diote "genozidio honen arduradunak inputatzea eta epaitzea"; eta Amerikako Estatu Batuei eta Europako Batasunari, "sarraskiaren konplize izateari uzteko".
Mobilizazioetan parte hartzeko deia
Bihar bertan, eguaztena, 18:30ean, zinemagileek antolatuta, Donostian egingo den ekintzan parte hartzeko dei egin diete herritarrei; baita urriaren 4an, Iruñean, Palestinaren alde egingo den manifestazioan ere. Horrekin batera, urriaren 25ean, 19:00etan, Arrasaten, manifestazioa egingo dutela iragarri dute.
