"Palestinar herrialdeak, bereziki, Gazak, bizi duen egoera larriaren aurrean, osasun-profesionalok ezin dugu beste alde batera begiratu. OMEk –Osasunaren Mundu Erakundea– jada adierazi du Gaza osasun-kolapso egoeran dagoela, eta ospitale bakar bat ere ez dagoela bere osotasunean funtzionatzen. Inor ez da libratzen. Gure lankideak jazarpena, atxiloketak, lesio larriak eta heriotza jasaten ari dira Israelgo estatuaren indarkeriaren eskutik", adierazi dute. Eta gaineratu dute "ospitaleetan lan egiten duten osasun-langileak erasotzea edo herritar zibilak setiatzea, janaririk eta botikarik gabe utziz, nazioarteko zuzenbidearen aurkakoa" dela: "Osasun-langileen, pazienteen, jaioberrien eta herritar zibilen babesari lehentasuna eman behar zaio beste edozein kezkaren gainetik".
Elkartasuna adierazi diote Palestinari; babesa, Gazarako Mugimendu Globalari eta Global Sumud Flotillari; eta horrekin batera, "Israelgo estatu genozida eta bere konplizeak salatu" dituzte.
26rako deialdia
Bigarren irakurraldi bat ere egingo dute: aste honetan bertan izango da, egubakoitzean, Arrasateko anbulatorioaren aurrean, 14:30etik 15:15era. Osasun langile oro ez ezik, herritarrak ere deitu dituzte ekintza sinboliko horretan parte hartzera.