Durangoko Azokaren "ateak zabaltzeko gogotsu" daudela azaldu du Beñat Gaztelurrutia koordinatzaileak, eta aurten, dei berezia egin gura izan die kultur zale guztiei, "kultur sistema osasuntsu baterako ezinbestekoak direlako". Durangoko Azokako ateak zabalik egongo dira, egunero, 10:30etik 20:00etara bitartean, azken egunean ezik; domekan, 18:00etan itxiko dituzte ateak.
Landako Gunean 274 erakusmahai ipiniko dituzte, 153 partaideren artean, eta 933 kultur nobedade egongo dira kulturazaleentzat. Gainera, tokiko lanekin batera, mundu mailakoak ere egongo direla jakinarazi du koordinatzaileak, esaterako, Palestinari buruzkoak. 200 ekitaldi inguru programatu dituzte, eta egitarau osoa durangokoazoka.eus webgunean dago ikusgai. Beste urte batez, euskarak eta emakumezkoak paper garrantzitsua jokatuko dutela jakinarazi du Gaztelurrutiak.
Aurrekontuari dagokionez, Gaztelurrutiak azaldu du "kultur hitzorduaren aurrekontua 735.000 eurokoa" dela. Horietatik %57 erakunde publikoek jarri dute, %25 Gerediaga Elkartearen baliabide propioak dira eta gainontzeko %18 babesle pribatuetatik datorrela jakinarazi du koordinatzaileak.
Aurkezpenarekin amaitzeko, Gaztelurrutiak adierazi du Durangoko azokan ez dela "inolako indarkeria matxistarik onartuko", eta horien aurkako protokoloa egongo dela, azokako toki ezberdinetan kokatuta egongo diren puntu moreez gain.
Azoka Telebista jarraipena egiten
Aurten ere, Goiena Komunikazio Taldea arduratuko da pantaila bestalde azokako erakusleiho izango den Azoka Telebista ekoizteaz, eta bertako koordinatzaile Aitor Agirianok adierazi du helburua dela Durangoko Azokan biziko dena lau haizetara zabaltzea. Goiena Komunikazio Taldeak, gainera, jarraipena egingo die Debagoieneko kultur sortzaileei eta kulturazaleei euskarri ezberdinetan, eta Debagoiendarrak Durangoko Azokan saio berezia eskainiko du, beste urte batez, Goiena Telebistan.
