Etxera bidea gertu lelopean egingo den manifestaziora joateko arrazoien artean azpimarratu dute aurrerapausoak eman badira ere, oraindik bide luze bat dagoela egiteko, "asko baitira, legeak dion baldintza guztiak beteta, baimenik jasotzen ari ez direnak". Horren adibide moduan aipatu dute, 3. graduan 110 presok egon beharko luketen arren, soilik 33 daudela.
Halaber, egon diren bederatzi gradu erregresioak "izugarrizko atzera pausoa" direla nabarmendu dute; horien artean dago Joseba Arregi oñatiarraren kasua. Garikoitz Garcia aretxabaletarra ere aipatu dute Sare Herritarraren Gabonetako irakurketa idatzian: "13 urte darama espetxean, azkeneko biak Zaballan, baina, nahiz eta baldintza guztiak bete, denbora horretan ez du inolako gradu progresiorik izan, bere eskubideak urratuz".
Autobusak herriz herri
Antzuola
15:00tan, Sagastiko autobus geltokitik
Izen ematea: Aitz Garbi tabernan
Aretxabaleta
15:15ean Azbetik
Tiketak Gurea eta Urbaltz tabernetan salgai.
Arrasate
Goizekoa: 11:00tan, Zalduspetik
Atsaldekoa: 15:00tan, Zalduspetik
Izen ematea: Irati, Monte eta Taupa tabernetan.
Bergara
Goizekoa: 11:00tan, Torrekuatik
Atsaldekoa: 15:15ean, Osintxu eta Angiozarretik / 15:30, Torrekuatik
Izen ematea: Polpolen eta Arrano tabernan.
Elgeta
15:30ean, Mendizaleen Plazatik.
Izen ematea: Haizea tabernan.
Eskoriatza
15:00tan Geltokiatik
Izen ematea: Ikernu tabernan.
Leintz Gatzaga
14:45ean
Oñati
Goizekoa: 10:00tan, Enpresagintzatik
Atsaldekoa: 15:00tan, Enpresagintzatik.
Sareren 'Gabonetako irakurketa', osorik
Egun on, eta eskerrik asko gaur hemen elkartu zareten guztiei.
Egun bereziak izaten dira Gabon egunak guztiontzako, gure inguruko eta familiaz gertuago sentitzeko garaiak, bazkari edo afari artean elkarrekin egotekoak, eta tamalez oraindik ere, etxe askotan hutsuneak luze dirau.
Gertuago daude, bai, gertuago ditugu, bai, eta horrek zalantzarik gabe, izugarrizko zama gainetik kentzea dakar. Hori guztion lanari esker izan da, 34 urtetan zaintza lanetan aritutako guztiena, kalean aktibo egon diren horiena, eremu instituzionalean, zein arlo politiko eta sindikalean honen amaieraren alde elkarlanean aritu diren guztiena. Gertuago eta 2. graduan daude, eta hau balioan jartzeko unea da.
Baina inork ez dezala pentsa bide hau hemen amaitzen denik, oraindik bide luze bat dugu egiteko, asko baitira, legeak dion baldintza guztiak beteta, baimenik jasotzen ari ez direnak adibidez, edo/eta 3. graduan 110 presok egon beharko lukete, eta soilik 33 daude… Etxeratze bidean jada, traba hauek nabariak dira. Kartzelako zuzendaritzen txostenen eta Eusko Jaurlaritzaren erabakien gainetik, Madrilgo oldarraldiak oztopo dira bide horretan.
Bederatzi gradu erregresio izan dira, eta hori, salbuespen neurriak bertan bera geratzeko bidean, izugarrizko atzera pausoa da. Gainera, 13 dira epaian zain daudenak, entzutegi nazionalaren fiskaltzaren errekurtsoak etengabeak dira, eta hau soilik mendeku eta gorroto ikuspuntu batetik uler dezakegu.
Baina guk, orain arte egin bezala, elkarbizitza eta etxeratze prozesua normaltasunez emateko desioa dugun guztion artean lanean jarraitzeko asmo irmoa daukagu. Ezin dugu bide hau erdizka utzi, eta etxeratze prozesua bururaino eraman arte, elkarlana, aktibazioa eta mobilizazioa sustatzen jarraituko dugu. Hori delako egoera hau eraldatzeko aukera bakarra.
Beraz, garai berri honetako erronkak begi bistan izanik, une hau ere balioan jartzen jakin behar dugu. Denon artean elkarlanean aritzeak duen indarraz jabe izan behar gara eta bide horretan sakontzea besterik ez daukagu, horrela gaindituko ditugulako oraingo traba hauek ere.
Beraz, gaur hemen eta Urtarrilaren 7an Bilbotik, preso, iheslari eta deportatuen etxeratze prozesuaren alde egingo dugu, salbuespen neurri guztien kontra.
Guztion artean lortuko dugu!
Eskerrik asko eta Bilbon ikusiko gara berriro!