Arrasateko Bilgune Feministak, Arrasateko Neska Gaztiak taldeak eta Arrasateko Emakumeen Mundu Martxaren Euskal Herriko plataformak deituta, elkarretaratzea egin dute gaur arratsaldean, plazan. "Getxoko kide transaren erailketagatik amorru betean geundela, emakume bat eraila izan da Bilbon. Lau izan dira aurten Euskal Herrian erail dituzten emakumeak*, eta azken hau ere ez da kasu isolatu bat, egunero kolpatzen eta erailtzen gaituen sistema baten ondorio krudelena baizik", salatu dute.
Erailketak sistema matxistaren "muturreko adibidea" direla azaldu dute, eta, hain zuzen ere, horregatik jo dute ezinbestekotzat gainerako eraso guztiak bistaratu eta salatzea: "Egunerokotasunean beste hamaika forma hartzen ditu indarkeriak: erakundeetan, lanean, harremanetan, jai giroan...".
Hala, "autodefentsa transfeminista" aldarrikatu dute, "bizitzaren aldeko apustu erradikala" dela azpimarratuz.
Bestetik, "neurri eraginkorrak hartzea" eta "duten erantzukizuna betetzeko" eskatu diete erakundeei. Halaber, nabarmendu dute indarkeria matxista geldiarazteko herritarren parte-hartzea ere ezinbestekoa dela.
Oñatin ere, sistema jopuntuan
Dozenaka lagun elkartu dira Oñatin ere, bi erailketak salatzeko. Sistemak "indarkeria matxista sostengatzen duela" azaldu dute eta autodefentsara jotzeko dei egin dute.
Antolakuntza eta elkar-babesa, Bergaran
Bergaran ere, Martxanterek deituta, San Martin plazan elkartu dira herritarrak. Antolakuntza, elkar-babesa eta autodefentsa faminista aldarrikatu dituzte, azken bi erailketak eta egiturazko indarkeria matxista salatzearekin batera.
Aretxabaletan "aski da"
Aretxabaletako Udalak deitutako elkarretaratzearekin bat egin dute hainbat herritarrek eta “aski dela” adierazi dute eta ezetz esan diete erailketa matxistei.
Emakumeentzako arreta zerbitzua:
- Araba, Bizkaia eta Gipuzkoa: 900 840 111 (24 orduz)
- Nafarroa: 016 (24 orduz)
- Ipar Euskal Herria: 3919 (24 orduz)
