Atzo goizeko 11:15ak inguruan gertatu zen ezbeharra: Aramaioko Nardeaga kaleko etxe bateko fatxadan lanean zebilen behargin bat bigarren pisutik erori zen, eskailera batera igota lanean zebilela. Minutu gutxira jaso zuen Segurtasun Sailak abisua, eta larrialdi zerbitzuak bertaratu ziren. Ia ordubetez izan ziren gertaeraren tokian bertan zauritutako langilea artatzen, eta egoera egonkortu zutenean, Gasteizeko Santiago Ospitalera eraman zuten.
59 urteko arotz oñatiarrak, baina, zauri larriak zituen; lekukoen arabera, buruan kolpe gogorra hartu zuen. Goienak jakin ahal izan duenez, gaur arratsaldean zendu da Arabako hiriburuko erietxean.
Erreakzioak
Heriotza baieztatu eta ordu gutxira heldu da gehiengo sindikalaren erreakzioa. ELA, LAB, ESK, Steilas, EHNE eta Hiruk elkarretaratzea deitu dute Prekarietatea hiltzailea, lan istripu gehiagorik ez! lelopean maiatzaren 16rako, astelehena. 12:30ean izango da, Foruen Enparantzan.
Beste bi elkarretaratze ere deitu dituzte beste hainbeste eragilek. Deba Bailarako Kontseilu Sozialistak, elkartasuna adierazteaz gain, gaur arratsalderako egin du deialdia: 18:30ean, Oñatiko Foruen Enparantzan. Oñatiko Eskubide Sozialen Aldeko Batzordeak, berriz, astelehen arratsaldean jarri du hitzordua. 19:00etan izango da, hau ere herriko plazan.
{LANGILE ERAILA}🔴ADI! Atzo larriki zauritu zen soldatapeko langilea zendu da.
— Kontseilu Sozialista Deba Bailara (@kontseilua_Deba) May 12, 2022
Gure elkartasun osoa helarazi nahi diegu senide zein ingurukoei.
Bide horretan, erailketa salatzeko kontzentrazioa deitu dugu bihar 18:30etan Oñatiko plazan. https://t.co/YGw2382YHV pic.twitter.com/mYRLCejJV4
Asteazkenean gertatutako lan istripuaren ondorioz zauritutako langile oñatiarra bart hil da.
— Oñatiko Eskubide Sozialen Aldeko Batzordea (@OnatikoB) May 13, 2022
Dagoeneko 27 dira lanean hildako euskal langileak.
Astelehenean 19:00tan mobilizazio zabal bat burutuko dugu plazan eta atxikimenduak jasotzen gabitz.#AskiDa#LanIstripurikEz
