Txirikila Aisialdi Elkarteak antolatutako Eskoriatzako udalekuak, uztailaren 5etik 23ra izango dira, goizez bakarrik, eta 150 haur inguru arituko dira 21 begiraleren ardurapean. Maialen Lete eta Ane Eraña izango dira koordinatzaileak, eta urteroko ekintzen dinamikekin jarraituko duten arren, berrikuntzak ere izango dituzte. Nabarmenena talde txikietan jardungo dutela da.
Aretxabaletan, berriz, 325 haurrek eman dute izena eta taldea 37 begiralez osatuko da. Loratuk antolatutako udalekuak dira, eta gehienez hamar haurreko taldetan banatuta, ekintzak herrigunean egingo dituzte, batez ere. Aretxabaletako kasuan, Eskoriatzan moduan, ekintzak goizez izango dira, bakarrik, eta egun osoko irteerak ez dituzte egingo.
Zikloka edo mailaka banatutako jaialdiak egitea ere ez dute baztertzen, baina, beti burbuila taldetan banatuko dituzte, begiraleen gidaritzapean.
Kontuan hartu beharrekoak
Aretxabaletako zein Eskoriatzako udalekuetara etxetik tenperatura hartuta joatea eskatuko dute antolatzaileek, eta haur bakoitzak norberak ere bere ura, maskarila, eta bestelakoak eramatea ere eskatuko dute.
