Aretxabaletako Udalak antolatu eta Loratu elkarteak koordinatuko ditu udaleku irekiak. Arrakasta handia izan du aurtengo deialdiak; izan ere, 300 umek baino gehiagok eman du izena. Astelehenean hasita hiru astez elkartuko dira astelehenetik egubakoitzera bitartean, 09:00etatik 13:00etara, eta gaztetxoenak, 2017an jaiotakoak, 10:00etatik 13:00etara.
Hamar laguneko taldeak osatuko dituzte, funtzionamendu independentea izango duten "talde burbuilak" hain zuzen ere. Hainbat jarduera egingo dituzte, guztiak ere ez aspertzeko helburuarekin. Beste ekintza batzuen artean, uraren eguna, mozorro eguna, altxorraren eguna, buztin tailerra, lid-dupa, fruta tailerra, karaokea, taldeko kamisetak egin, eskulanak, tirolina edota body painting-a egingo dituzte etxeko txikienek.
Gainera, herriko hainbat lekutara ere gerturatuko dira; besteak beste, honako hauetan elkartuko dira: Otala Zelai, skate parka, pilotalekua, Apotzaga auzoa, Iralabarriko plazatxoa, Kurtzebarri eskolako kantxa, Galartza auzoa, Urkulu eta komentua.
Prebentzio neurriak
Udaleku irekietako koordinatzaileek COVID-19aren aurrean hartu beharreko derrigorrezko higiene eta prebentzio neurri ezberdinak ezarri dituzte; hona hemen horiek:
- Haurrak etxetik tenperatura hartuta joatea gurasoen ardura izango da.
- LHkoentzat nahitaezkoa izango da musukoa erabiltzea.
- Haur bakoitzak egunero motxila batean ondokoak eraman beharko ditu: gel hidroalkoholiko pote bat, hamarretakoa, ura eta eguzkitako krema.
- Partaideren batek udalekuetako ordutegia baino lehenago joan edo irten behar izan ezkero, aurrez adierazi behar izango du; zuzendariak antolatuko du nola egingo den joan-etorria.
- Begiraleak talde partaideen osasun egoeraren berri informatuak mantendu beharko dira.
- Partaideren batek medikura joan behar izan ezkero, programaren zuzendaria informatu beharko da COVID-19arekin loturiko sintomagatik den ala ez.
