Gure Eskuk '11 GARA' sinadura bilketaren ekimena atera du "lozorrotik"

Hasier Larrea 2021ko mai. 12a, 20:37

Erreferendum lotesle bat lortzeko erronkari heldu zion 2019an,  '11 GARA' ekimenarekin "euskal gizarteari zegokion lekua har zezan eskatuz". Bailarako herrietan maiatzaren 22an egingo dituzte sinadurak biltzeko ekimenak; Antzuolan zapatu honetan jarri dute hitzordu hori, San Isidro azokarekin batera. 

Ekimena aurkezteko prentsaurrekoan Maite Aristegi Larrañaga Etxalde baserritarren mugimenduko ordezkaria, Jabier Etxaniz Apaolatza Antzuolako Gure Eskuko batzordekidea, Aitor Eraña Perez de Arroiabe Bergarako Pol-pol mendi taldeko lehendakaria, Felix Beltran de Heredia Perez de Mendiguren Aretxabaletako Gure Eskuko batzordekidea eta Jasone Giraldo Menendez  Arrasateko Gure Eskuko batzordekidea azaldu dira.
 

Hilaren 22an, Arrasaten, Bergaran eta Aretxabaletan

Gure Eskuk 11 GARA ekimena babestera deitu ditu debagoiendarrak: "Duela bi urte abiatutako sinadura bilketa masiboa berreskuratzea da asmoa", adierazi du Jasone Giraldok. Beraz, hilaren 22an, zapatua, 12:30ean jarriko dituzte sinadurak biltzeko mahaiak Arrasateko eta Aretxabaletako herriko plazetan, eta Bergaran Domingo Irala kalean 12:00etan.
 

Hilaren 15ean, Antzuolan

Antzuolan, aldiz, hilaren 15ean egingo dute sinadura bilketa, herriko plazan, 11:30ean. Jabier Etxaniz Gure Eskuko kidearen esanetan, "San Isidro azoka eta landa giroarekin bat doalako aurkeztuko dugu ekimena egun horretan". Hala, antzuolarrei "sinadurarekin eta parte hartzearekin konpromisoa hartzeko" eskatu die, eta ekainean zehar beste ekintza bat antolatuko dutela ere aurreratu du.

Erreferendum loteslea jomugan

Aliantzak josteko eta herritarrak batzeko, eragile guztien babes eta atxikimendua behar dutela adierazi du Giraldok: "Erreferendum lotesle baten bila gabiltzalako, herritarrok gure auzietan erabakitzeko eskubidea eta beharra daukagulako, eta pandemia honetan inoiz baino kontzienteago izan garelako elkarrekin lan egitearen garrantziaz". Burujabetzaren alde, mahaietara gerturatu eta galdetzera animatu dituzte debagoiendarrak: "Ibilbide luze honetan konplizeak behar ditugu, badelako garaia lozorrotik irten, hautsak astindu eta elkarrekin gure etorkizuna nolakoa izango den erabakitzeko".

Uztailaren 3an Bilbon ekitaldi nazionala egingo du Gure Eskuk. 

QR bidez sinatu daiteke irudi honekin.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak